Streektaolteut
Dit is de tweede aflevering van de maandelijkse streektaalcolumn van schrijfster Femmy Woltman uit Giethoorn.
Waor ’t harte vol van zit stuwen kopzorgen naor ‘t hoogtepunt en ’t is dudelijk waor dat an lig, de oorlog in Oekraïne. Oorlog, vernielingen, meensenlevens, het is vreselijk en is niet in woorden uut te drukken. Oorlog, ver weg maar toch zo dichte bi’j. Wi’j dochten dat alles weer ’normaal’ zol worden nao corona, dat werd in iene klap van de kaorte eveegd en dan kreg plezier maeken een flinke deuke.
Olympische Speulen
Om de sombere gedachten toch maar te verzetten is het beter om de gedachten te keren en gao dan ies even trôgge naor die twee weken Olympische Speulen. De televisie ef toen knap overuren edri’jt. Alle wintersporten kwamen op ’t schaarm mit prestaties waor a-j de pette veur ofnemen. Salto’s, slalommen, op een slee mit een snelheid waor a-j op de weg een dikke bekeuring veur zoln kriegen. Acrobatiek bi’j ’t kunstrieden. Dat is wat aanders dan rechtuut rieden mit een paer bochten, wat niet wil zeggen dat ook hier geweldige prestaties bin eleverd. Ook curling was spannend en diegene die mit dat stoffertie vegen toch zeker ook anspraoke kunnen maeken op succes. Menige veurspelling, mit een zekerheid op gold, is over egaon op teleurstellingen. Veul te veurbaorig. De felicitaties’s veur alle winnaars en verliezers want het is dudelijk, verliezers maeken een wedstried. Daor ku-j niet zonder. Respect veur hen die de schaesen an de wilgen hangen maar die jaorenlaank het ‘volk’ em-m laoten genieten van hun prestaties. De Paralympische Speulen is ook al weer verleden tied waor ook knappe prestaties bin-n eleverd.
Taol en Kennisquiz
Deur Corona knapten veule draoden maar de draod van de Steenwiekerlandse Taol en Kennisquiz is weer an enaander eknoopt zodat het weer verder kan en dat wordt op 28 Meert en wordt in Klooster presenteert. Men kan van Kennis en van Streektaol genoeg opsteken, maar dot beslist gien ofbreuke ook al eb ie: “Het nog nooit op de vioele euren speulen.”
Femmy Woltman