Streektaolteut: De deure stiet los ….
“Nee,” zegt de meester, “de deur staat open. De beer is los. ”Daor gao-j al en, verwarring in de streektaol. Zo bin er gezegden en uutspraoken waor a-j gien touw an vaaste kunnen knopen en waor uutleg wel bi’j mot. Maar hier olln wi’j het bi’j :‘De deure stiet los.’’
Wiedewaegen los zodat er heel veule volk deur kan. Van buten naor binnen en van binnen naor buten maar dat leste gebeurd te weinig. Wanneer er heel veule volk binnen komp kan er een knippe op de deure worden edaon maar de deure blef los blef staon veur meensen in nood. Vluchtelingen die hopen dat, ienmaol binnen, er een veilige toekomst is. Gien angst, niet in de butenlocht moeten slaopen en op tied eten kriegen. Het is ze egund, maar zo het altied is ewest, de goeien moeten het mit de kwaojen ontgelden.
Wie is goed?
Wie is goed en wie bin-n de kwao’jen. Er ontstond een ni’je naeme n.l “De veiligelanders.’ Bin dat de kwaojen? Hoewel niet iederiene mit dezelfde kaome mot worden bewaarkt, veur de ‘veiligelanders’, goed of slecht, mos de knippe al eerder op de deure. Allemaole naor binnen maar waor schienbaor gien slot of grundel veur de deure emeuken kan worden om dizze dichte te doen. De stroom hulp zeukenden blef maar an-olln. Het giet maar deur. Maar dan…Waor mot dat volk allemaole wonen?
Gelôkzeukers
Er zal op een keer een oplossing koemen ook al zal dit ten koste gaon van aandern die ook in nood zitten. Maar gelôkzeukers, die in eigen laand geen vreze em-m, en waor volk onder zit die veur overlaast zorgen, nee, daor hoeft een fatsoenlijk meense niet lange over nao te daenken, dat volk mot zo gauw meugelijk rechtsomkeer maeken al zullen ze dit zelf niet bedaenken.
De baankskroeven moeten an edri'jt worden, aanders blef het een waankel en onzekere toekomst veur iederiene. Veur jongeren die ook een eigen stekkie zeuken, daorveur is het te hopen dat er ruumte over blef en mit dat gelôk an een eigen toekomst kunnen bouwen.