Nieuwe aflevering streektaalcolumn Femmy Woltman: Waor is de bezeuker mit kwaliteit?
· leestijd 1 minuut ColumnIn deze maandelijkse streektaalcolumn schrijft Femmy Woltman uit Giethoorn dit keer over ‘Kwaliteitsbezeukers’.
Kort ezegd: De ‘Kwaliteitsbezeuker’, wie is dat? Onlangs werd er een ni’je publiekstrekker onthuld. Mit een flinke druk op een knöppe om het boegbeeld van Weerribben en Wieden andacht te geven. Het Boegbeeld in 2024 is zo te zien een Flagelander die bi’j de naeme wordt eneumd as ‘Wouter’. Wi’j zeggen Wolter maar wat zeg now een naeme as het dezelfde persoon is. Wouter is herkenbaar an een oranje jasse. Wouter giet bezeukers rondleiden in Weerribben en Wieden en misschien as toegift, giet hi’j ook nog mit het rietsnit an de gaank. “Kiek volk, zo deden ze dat toen. Gien meziene kwam er an te passe.” De slogan in 2023 was: ”Mooi da-j d’r bin-n.” Een mooi en hartelijk welkomswoord veur volk dat er al is, maar is toch niet een reclame om volk te trekken? “Mooi da-j koemen,” zol beter wezen as reclame veur dit waeterriek gebied. “Iederiene is welkom,” mot er dan nog aachteran. Maar wat is now de ‘Kwaliteitsbezoeker’ waor de gebiedsontwikkelaar het over ef. Het volk anzetten om te koemen naor Weerribben en Wieden maar wordt er bi’j ezegt: “Het niet giet om veule bezeukers maar wi’j kieken uut naor ‘Kwaliteitsbezeukers’.” Tjonge jonge, ‘Kwaliteitsbezeukers’, mit meui’jte ku-j dat woord uutspreken. De hele wereld zie-j veurbi’j gaon, maar waor lop de bezeuker mit kwaliteit? Now bin-n de Ribben en de Wieden en ook niet tussen de vonders en brôggen te vienden dus, begriepelijk, Wouter is daor niet. De dorptoerist ( ni’j woord) geniet. Gelegenheid genog veur een nattie en een dreugie. ‘Kwaliteitsbezeukers’, zeker, die lopen overal. Die genieten van vonders, van brôggen, van riet en waeter, van trilveen en riet en van aordig volk. Alle bezeukers em-m dan een mooie dag en morgen en overmorgen bin-n er weer aandern en dan en dan… Dat iene dorp ef alle andacht en bevolkt zodoende Weerribben en Wieden mit bezeukers waor Wout klaor stiet om te vertellen hoeveule volk hier krom ef elegen. Waor geschiedenis wordt vertelt. Weerribben en Wieden gaon in ontelbaore ‘pictures’ de hele wereld over. “Mooi da-j er bin-n.”
