Dialectcolumn: Terugblik Sint Jansklooster 2024

Dit is een nieuwe aflevering van de dialectcolumn van Frouk Alice Weijs-Kroek. Dit keer geeft ze een terugblik op hoe het jaar 2024 voor Sint-Jansklooster is geweest.

Eerste Karstdag 2024. Wi’j zittn mit de hele Weijs-clan ’s oams an een prachtig versierde toafel in et huus van ien van onze kienders. Terwijl ik zo et vrolijke spullegien bi’j langes kieke bin ik dankbaar dat wi’j mit zien alln in Sint Jansklooster woonn. Een dörp dat op zich niet groot is maar wel groots is in wat wi’j mit mekare allemoale kunn bereikn. As wi’j de Kloosterribbn der op zettn is er gien grens an onze meugelijkheedn.

CORSO

Zo ef SBS6 dit joar een 6-delige serie uut e-zundn onder de titel ‘Corsokoorts’. Die serie vuul niet metiene bi’j iederiene in goeie aarde. Noa de eerste paar uutzendingn wörde et gelukkig steeds boeiender en was et soms ok angriepend en emotioneel. Et bleek dat zelfs de stoerste corsobouwer een heel klein en goed harte ad. Et corso wörde doarnoa ok nog ies uut e-zundn deur Max en TV Oost. Goa der maar an stoan, wat een prestatie!

VHK

De spörtverienige VHK bestond dit joar 70 joar. Dat is mit recht ok een prestatie veur zo’n klein dörp. Die manschafftn em in saamnwarking mit COOP HOBMA een leuk plaaties- en stickerboek uut e-geevn en ok hoevn wi’j nooit meer te twiefeln of een voetbalwedstried uut of thuus is. Mooie en dudelijke bördn woar dat op vermeld wördt stoan bi’j diverse ingangn van et dörp.

WONINGBOUW

Eindelijk is dit joar de start begunt van de bouw van huur- en koopwoningn in et hart van Klooster. Menig jonge Kloosterkop ef hiervan een huus kunn bemachtigen. Maar oh, wat ef dat weer lange e-duurt! Wat een liedensweg is et veur onze jeugd um an een betaalbare woning te kunn koomn. De eerste nood is now gelukkig eem e-lenigd, maar wi’j bin er nog lange niet. Der bin nog zoveule jonge inwoners die snakkn nur een woning!

TIK VAN DE MEULE

En weer is Klooster op tillevisie e-koomn dankzij een mooie reportage van Geert Jan Lassche op NPO2. Begunt as illegale piraatzender in een keet maar uut e-gruuid tot een evenement dat zien weerga niet kent keekn wi’j nur et inmiddels beroemde muziekevenement ‘Tik van de Meule’. Dit joar in een nog grotere feesttente dan et joar doarveur, mit ongeleufelijk veule liefhebbers van veural onbekende Nederlandstalige liederen. Een prestatie van jewelste van de organisatie! Zelfs noa et compleet ofbrandn van hun eerste keet, inclusief al hun unieke plaaties en kostbare apparatuur, wus Klooster (en zelfs ver buutn Klooster!) de mann weer in de bienn te helpn mit grote financiële steun. Prachtig um te zien hoe die jongens dit evenement op em weetn te bouwn tot ongekende grootte.

COA

Begun dit joar gung er eem een schrik deur Klooster: der waarn geruchtn dat er een COA op camping ‘Het Kamper Erve’ zol koomn. Meningeen uitte hierover zien zörgn. Der waarn der bi’j die dwars veur de ingang zolln goan ling as et warkelijk zoverre zol koomn. Noa contactn mit de gemeente en et COA bleek dat er gien gesprekkn hierover e-voerd wördn en dat et er ok niet zol koomn. De gemoederen bedaardn doarnoa weer snel.

WARENHUIS VAN DE WETERING

Dit kleine warenhuus in Kadoelen ef ofgeloopn joar wel wat mee e-maakt: een auto vernielde de complete veurgevel van de winkel. In een dörp as de onze is dat wel een biezunder gebeurn. Menigeen mos der dan ok eem langes riedn um te kiekn nur de vernieling. De gevel is inmiddels weer

repareert, de winkel is weer toonbaar. An et ende van dit joar is de eigenaar Oarnt Tol (Arend van de Wetering 83 jr), al was ie ziek, toch nog plotseling overleedn. Een karakteristieke man mit een karakteristiek buurtwinkeltien. Een winkeltien dat tot now toe gien opvolging kent en dus vast zal verdwienn.

ONGELUK

En dan dat vreselijke ongeluk woar een dörpsgenoot bi’j um et leevn kwam. Veur de familie, de chauffeur en et dörp een ongeleufelijk triest gebeurn wat nog steeds een grote impact ef. Zo’n impact dat zelfs de complete feesttente van Tik van de Meule een minuut lang stilte in acht nam veur dit schokkende ongeval. ‘Want der bin wel belangriekerere dingn dan alleen maar feestn’, aldus de organisatoorn van TvdM.

Kiek, en dat is Sint Jansklooster. Van alles wat, maar in de basis een dörp dat nur mekare umme kek en wet wat uuteindelijk et belangriekste is: NIET IKKE, NIET IEJE, MAAR WI’J!