Streektaolteut: Aandenbienderties op de talter
· leestijd 1 minuut ColumnIn deze maandelijkse streektaalcolumn schrijft Femmy Woltman uit Giethoorn over aandenbienderties op de talter.
Kiek die twee daor now ies tevreden en vriendelijk zitten taltern. Die laachende koppies daor wordt een meense toch bliede van. Kleine kiender moeten bewaekt worden dus blieven ze wel in ’t zicht van die gene die de zorg veur hen dreg. Bi’j het groter worden kriegen ze wel antwoord op vraogen over waoromme.
De verzorgers van aandenbienderties em-m nog gien idee hoe het leven van eur grut zich kan ontwikkeln maar ze hopen dat het kiender worden die wat veur een aander over em-m en eerlijk deur ’t leven gaon. Er wordt stiekem edroomd dat ze nao de legere skoele verder leren en wel meester kunnen worden of directeur van een groot bedrief. Die mee daenken over het volgen van onderwies waor ze naotuurlijk zelf over moeten beslissen, maar dan komp er een tied dat aandenbienderties eur eigen gaank gaon. Het bin gedachtenbienders eworden want bi’j opvoeders blieven ze in de gedachten. Kleine kiender em-m gien idee wat zich ofspeult in de grote meensenwereld en dat is maar goed ook want het is bedroevend esteld tegenwoordig.
Misstaanden in overvloed maar ook in eigen laand is de deugd weg. Glad van de wieze. De ofgunst op allerlei gebied is volop anwezig. Bedrog, een mening geven mit woorden die ze as kiend niet em-m eleerd. Een aander deur de stront haelen, leugens verspreiden over aandermans leven. Het olt niet op. Bin het uutzunderingen? Die bin-n er altied maar dit soort uutzunderingen moeten gien regel worden en hier begunt het wel op te lieken. Directeur, minister, advekaot, leiding gevende personen, zonder of mit opleiding, bedroevend. Mot now overal een vraogteken bi’j of ze wel deugen? De oplettende older ef aandenbienderties op het rechte spoor ezet wanneer ze uut etalterd waren, maar dat rechte spoor kreeg bi’j sommigen minne kronkels.
Glad van ’t padtie of en hopelijk komp er een tied waor fatsoen en verdreegz’mheid de boventone ef, zodat iederiene rustig en vrolijk deur kan taltern zonder dat het touw brek en dit deur kunnen geven an wie dan ook. Een vriendelijk gezicht brengt overal licht.
Kiek maar naor die twee aandenbienderties op de talter.
Femmy Woltman.