Mit Gieters Gevaer deur de Kop
· leestijd 1 minuut ColumnIn deze maandelijkse streektaalcolumn schrijft Femmy Woltman uit Giethoorn dit keer over ‘Het Gieters Gevaer’.
Het is weer zover. De meeste bloemen verliezen kleur en ‘t blad begunt te riegeln. Het gevaer in de graachten en wieden blef nog even deurgaon, maar mit iene heftige aarfst beui’je slaankt dat ook of. Boten van alleraande materiaal en kleur em-m de waeteren in De Kop bezet. Tussen al die glimmende boten vaert een echte ‘blikvanger’. De diamant van alle gevaer, die as een statige zwane over het waeter gledt. Dit pronkstôk is onderdeel van ‘Het Gieters Gevaer.’ Dit is een verzamelnaeme van olten bokken, vlotten, punters en booties, die vroeger de vervoersmiddelen waren veur waark.
‘Het Gieters Gevaer’ is bi’j de punterbouwers van de waarf erold. Vroeger werden dizze olten vaertugen eteerd, maar mit de tied kregen gelakte ieken punters de overhaand. De sier ef de noodzaek versleugen. De bok, het vlot en zelfs het melkersbootie em-m ofedaon veur het waark waorveur ze gebruukt werden, maar punters overtröffen alles wat mit schoonheid ef te maeken en geven het ‘Gieters Gevaer’ alle respect.
De punter valt niet onder de naeme nostalgie. De punter stiet ten dienste van vervoer en zeker veur vertier en plezier. Gien enkel aander drievend vaertuug kan zich verienzelven of anspraoke maeken om bi’j het echte ‘Gieters Gevaer’ te euren.
Stel joe veur. Hoe mooi het in De Kop van Overiessel ook is vanwege rust en schoonheid het liekt het er niet op om zich bi’j de besten van Nederlaand te presenteren. Van de 342 beste gemeenten stiet Steenwiekerlaand op de 168ste plekke. Now zeggen ciefers niks, maar toch em-m bewoners zelf te kennen egeven dat er nog veule an veraanderd kan worden. Het ontbreken van ‘t ien en aander, onder aandere busverbindingen, geldautomaat, winkels, het drukt een stempel om bi’j de besten an te schikken. Wat is now een ciefer. ”Het gef allemaole niks want wi’j olln van mekare.”
En dat olln van is kenbaor emeuken toen Rob Bats veur zes jaor is herbeneumd as burgemeester. An zien straolende gezichte is wel te zien dat hi’j zich thuus veult. Gefeliciteerd burgemeester Bats, het gao joe goed.
