Streektaolteut van Femmy Woltman: Moderne kringloop
· leestijd 1 minuut ColumnIn deze maandelijkse streektaalcolumn schrijft Femmy Woltman uit Giethoorn dit keer over kringloop.
Tieden veraandern, wordt er vaeke ezegt. Inderdaod, de tied dreg ni’je ideeën an. Is uut-evunden deur vernuftig en- of creatief volk dat deur sommigen direct wordt an -eneumen as waorheid. Wat de iene antrekkelijk viendt, wordt deur een aander mit de nekke an ekeken. De lente is dichte bi’j en de zomer in het veuruutzicht, dan wordt de kledingkaaste inspecteert en dan kan het veur koemen da-j tot de conclusie koemen dat het ook ‘neudig’ tied wordt om wat ni’js an te schaffen. Wie in dezelfde maote kan blieven en gien grammegie meer ef dan ienige tied trôgge, die ef dan gelôk en kan de knippe dichte olln maar ja, een blouse of trui die al heel wat lentebloemen ef zien bleui’jen, die mot toch maar naor een aandre bestemming.
Tevreden geveul
Om altied in hetzelfde goed te lopen, daor wordt een meense ook niet vrolijk van en wanneer gien sleetsheid is te zien, dan is de gaank naor de kringloop een oplossing. Hier kan het mooi in het rek worden ezet om te verkopen. Wat een tevreden geveul heerst er dan, want eerlijk ezegd, het ging eur zelf ook knap an ‘t harte want mit dizze mooie, ja prachige blouse kon ze eur laoten zien en kwam ze altied heel netties en veurnaem mee veur de dag. Wie zol ze hier bliede mit kunnen maeken, want bliede zol de ni’je eigenaar zeker wezen. Ik zol zeggen, gefeliciteerd mevrouw het is joe egund. Ie kriegen beslist gien spiet.
Modern
Tweedehands kleding is modern. Er worden zelfs winkels estart waor kleren van een aander worden an- eprezen en hier is niks mis mit. Zunde om hier niks mit te doen en zeker zunde om bi’j de lompen te smieten. Daenk now maar niet dat hier volk naor toe gaon die an de aarmoegrens zitten, wel nee. Van hoge tot lege, van klein tot groot komp wel ies in een kringloopwinkel al is het alleen maar om te groffeln, te snui’jen, om iets te zeuken naor een koppie wat het servies compleet kan maeken en hoera! naor uus giet mit die prachtige, veurnaeme blouse.
