Het verschil in succes
· leestijd 1 minuut ColumnIn deze maandelijkse streektaalcolumn schrijft Femmy Woltman uit Giethoorn dit keer over voetballers en schaatsers (m/v).
Zie zeggen dat mannen veule kleinzeriger bin-n as vrouwen. Dat was wel te zien tiedens voetbalwedstrieden op de Olympische speulen ofgeleupen zomer. Tjonge jonge wat konden die mannen krimmeneren en sommige kerels piepen al wanneer er een klein schrammegie op een been is te zien. Wat een anstellers. Zie vallen drekt wanneer een aander ze op de ti’jen stapt en dat giet dan meestal ook nog per ongelôk. Van een kleine anraeking blieven sommigen minuten laank op ‘t veld liggen. Koemen dan mit hulp weer in de benen, lopen strompelend weg en even laeter rennen ze as een dolle geite aachter de balle an. Kiek, dan ku-j het verschil zien tussen mannen en vrouwen. De voetbalvrouwen strieken en wrieven wat over ‘t been, lopen wat verkrampt maar klaegen en angaon doen ze niet. Op de taanden bieten en deurzetten.
Over deurzetten espreuken. Een veurbeeld van deurzetten is te zien bi’j schaetswedstrieden. Hier bin-n mannen en vrouwen geliek. Deurzetten en alle kracht benutten. Uutzunderingen bin er altied en hier is dat toch wel Jutta Leerdam. Een internationale schaatsdiva die an eur leven een eigen invulling gef die uut twee werelden bestiet. Ze is niet an-esleuten bi’j een ploeg en traint, mit de Olympische speulen van 2026 in gedachten, maar ook veur de wedstrieden die nog koemen. Jutta combineert sport en show. Showt in glitterjurken waor ze wereldwied alle bewondering mit kreg. Succes van harte egunt maar via het medium, naost lovende woorden ook de meest smerige woorden die a-j maar kunnen bedaenken. Jaloers, ofgunst, het verstaand niet in-eschakeld? Wanneer Jutta en zeker ook eur concurenten in een vol Thialf tiedens een rit wordt an-emoedigt dan bin-n hier misschien die baankzitters bi’j die dan niet daenken an een show in een glitterjurk. Nee, dan em-m ‘wi’j’ succes. Het giet goed mit ons.” Een sportvrouw in schaetspak is op dat moment ver van glitterjurk en show. Deurzetten op alle fronten dat beloont wordt mit anmoedigingen en applaus van duuzenden in dat volle Thialf. Ik doe mee!
