Nieuwe aflevering Taolteut: Kleren sieren de sporters
· leestijd 1 minuut ColumnIn deze maandelijkse streektaalcolumn schrijft Femmy Woltman uit Giethoorn dit keer over sportkleren.
Waor een meensen zich al drôk omme kan maeken. Commentaar over van alles en nog wat. Wat is er een gedoe over een witte baand die een voetballer om zien heufd ef tiedens wedstrieden, maar wat te zeggen over al die lopende schilderi’jen? Er lop volk waorvan de huud, waor ze mit bin-n geboren, niet meer is te zien. Allemaole kunst op ‘t vel en dan zol een witte baand verbeuden worden? Zoe’n baand ef doodgewoon een functie. Het vangt zweet op. Zonder zweetdruppels in de ogen is alles beter te zien, er wordt gien balle emist. Die witte baand eurt bi’j het voetbaltenue. Om deur te gaon mit zeuren dan nog de raod dat sportmannen de baord of scheren. In de eerste plaese is het gien gezichte en bovendien mot de baordman meer opboksen tegen iene zonder baord. Gestroomlijnd bevordert snelheid.
Maar kiek now ies. Wat doen de dames bi’j athletiek. Bovenstôk, een blote boek en een heel kort broekie. Niks gestroomlijnd, maar het veurdeel is wel, frisse wiend langs ‘t lief en wie daor ook zo van olln, dat bin-n de dames van het strandvolleybal. Weinig om sportkleren an te trekken. Zo klaor. Een bovenstôk en een broekie dat an de rôggekaante het woord broek niet weerd is. Het is tenslotte toch strandvolleybal.
De heren, die dezelfde sport bedrieven sporten in een sportbroek en shirt waor niks gien bloots is waor te nemen. Dit is normaal dus hierover gien geteut. Maar waor giet het eigenlijk omme? De sport. Sport boven alle aargenissen en wordt totaal vergeten as er maar succes is. Alle hoop en now maar uutkieken naor een mooie sportzomer mit legio haorbaanden, mit allerlei kunstvariatie’s in sportschoenen, mit lange of korte broek, ien ding is wel zeker, de televisie zal overuren dri’jen. Dat het gezegde ‘Sport verbroedert’, vrouwen mee eteld, in ere wordt ölln, maar wat heel belangriek is, dat alle evenementen zonder incidenten verlopen en meegaond mit een Oosters wijsheid: “Heb joe’n tegenstaander lief, maar wees sneller dat zi’j.”
